فلسفہ زدہ پیرزادے کے نام : دیں ملک زندگی کی تقویم دیں سرِّ محمدؐ و براہیمؑ

تو اپنی خودی اگر نہ کھوتا
زناریِ برگساں نہ ہوتا

ہیگل کا صدف گہر سے خالی
ہے اس کا طلسم سب خیالی

محکم کیسے ہو زندگانی
کس طرح خودی ہو لازمانی

آدم کو ثبات کی طلب ہے
دستور حیات کی طلب ہے

دنیا کی عشا ہو جس سے اشراق
مومن کی اذاں ندائے آفاق

میں اصل کا خاص سومناتی
آبا مرے لاتی و مناتی

تو سید ہاشمی کی اولاد
میری کفِ خاک برہمن زاد

ہے فلسفہ میرے آب و گل میں
پوشیدہ ہے ریشہ ہائے دل میں

اقبال اگرچہ بے ہنر ہے
اس کی رگ رگ سے باخبر ہے

شعلہ ہے ترے جنوں کا بے سوز
سُن مجھ سے یہ نکتۂ دل افروز

انجامِ خرد ہے بے حضوری
ہے فلسفہ زندگی سے دوری

افکار کے نغمہ ہائے بے صوت
ہیں ذوقِ عمل کے واسطے موت

دیں ملک زندگی کی تقویم
دیں سرِّ محمدؐ و براہیمؑ

علامہ اقبال

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.